16.08.2025-ci il tarixdə Qobustan rayonu Nabur kəndində Vətən müharibəsi Şəhidi Məmmədov Bəxtiyar Bayramşah oğlunun doğum günü tədbiri keçirilib.
16.08.2025-ci il tarixdə Qobustan rayonu Nabur kəndində Vətən müharibəsi Şəhidi Məmmədov Bəxtiyar Bayramşah oğlunun doğum günü tədbiri keçirilib.
Tədbirdə Qobustan rayon İcra Hakimiyyətinin əməkdaşları, Şəhid ailələri və rayon ictimaiyyətinin nümayəndələri iştirak edib.
Tədbir iştirakçıları Şəhidin məzarı önünə gül dəstələri qoyub.
Tədbirdə Qobustan rayon İcra Hakimiyyətinin əməkdaşı, Vətən Müharibəsi İştirakçıları və Şəhid Ailələri ilə İşin Təşkili Şöbəsinin müdiri Rövşən Dəmirov çıxış edərək şəhidin döyüş yolu haqqında məlumat vermiş və Vətən Müharibəsində qazanılan tarixi zəfərin önəmini qeyd etmişdir.
Bəxtiyar Bayramşah oğlu Məmmədov 1996-cı il avqustun 16-da Qobustan rayonunun Nabur kəndində anadan olub.
Şəhid olmağı özünə şərəf bilən hər kəsin daxilində yüksək vətənpərvərlik, cəsurluq, müsbət əxlaq, əqidə vardır. Elə buna görə də onlar şüurlu şəkildə ölümü gözə ala bilirlər. Belə şəhidlərdən biri də Bəxtiyar Məmmədovdur.
Azərbaycan Ordusunun çavuşu olan Bəxtiyar Məmmədov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin azadlığı uğrunda gedən döyüşlərdə savaşıb. Bəxtiyar Məmmədov sentyabrın 30-da Füzuli döyüşləri zamanı şəhidlik zirvəsinə yüksəlib.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Bəxtiyar Məmmədov ölümündən sonra "Vətən uğrunda" medalı ilə təltif edildi.
Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Bəxtiyar Məmmədov ölümündən sonra "Füzulinin azad olunmasına görə" medalı ilə təltif edildi.
Uca Tanrıdan vətənimizin azadlığı, müstəqilliyi, ərazi bütövlüyü uğrunda canını fəda etmiş Şəhidlərimizə rəhmət diləyirik!
