Vaxtında, düzgün göstərilən baytarlıq xidməti sağlam heyvandarlığın və təhlükəsiz ərzaq təminatının əsasıdır

Vaxtında, düzgün göstərilən baytarlıq xidməti sağlam heyvandarlığın və təhlükəsiz ərzaq təminatının əsasıdır

   Heyvandarlıq sahəsi kənd təsərrüfatının əsas istiqamətlərindən biridir və onun dayanıqlı inkişafı ilk növbədə epizootik təhlükəsizliyin təmin olunmasından asılıdır. Bu baxımdan, baytarlıq xidmətlərinin səmərəli təşkili həm kənd təsərrüfatı məhsullarının keyfiyyətinə, həm də əhalinin sağlamlığının qorunmasına birbaşa təsir göstərir.

   Aqrar rayon olan Qobustanda da bu sahə daimi olaraq rayon rəhbərliyinin diqqət mərkəzindədir.   Rayonda baytarlıq işlərinin təşkili, peyvəndləmə  tədbirlərinin vaxtında aparılması, dezinfeksiya və profilaktik nəzarət  işlərinin mütəmadi həyata keçirilməsi üçün lazımi dəstək və nəzarət mexanizmi yaradılmışdır.  Rayon rəhbərliyi  vaxtaşırı kəndlərdə əhali ilə keçirilən görüşlər zamanı ictimai, sosial və s.  digər vacib məsələlərlə yanaşı  kənd təsərrüfatı, heyvandarlıq, quşçuluq, taxılçılıq sahələri ilə də bağlı geniş müzakirələr apararaq ictimai maarifləndirmə tədbirlərini  həyata keçirir. Nəticədə isə heyvandarlıq məhsullarının keyfiyyəti  artır, kənd təsərrüfatı daha məqsədyönlü və səmərəli inkişaf edir.

                                Epizootik tədbirlər və profilaktika

Əgər vaxtında və düzgün  baytarlıq xidməti göstərilərsə, işlər günün tələbləri səviyyəsində qurularsa bölgədə epizootik  sabitlik qorunar, heyvan xəstəliklərinin qarşısı vaxtında alınar. Bu istiqamətdə rayonda mövcud vəziyyətlə bağlı Qobustan rayon Heyvan sağlamlığı və baytarlıq xidmətinin rəisi, baş baytar həkim Emil Zinharovla həmsöhbət olduq. O bildirdi ki, hazırda rayonda epizootik  vəziyyət sabitdir. Hər il olduğu kimi bu il də iribuynuzlu və xırdabuynuzlu  heyvanlarda  müxtəlif yolxucu xəstəliklərə qarşı vaksinasiya aparılmışdır.  Məsələn, dabaq , nodulyar dermatit, qarayara, çiçək, rev-1, stamp 19(B-19), itlərdə quduzluğa, vəhşi heyvanlarda oral quduzluğa qarşı(meşə ətrafı yemlər qoyulmaqla) profilaktik peyvəndləmə işləri həyata keçirilmiş və davam etməkdədir. Dabaq xəstəliyinə qarşı peyvəndləmə 6 aydan bir, digər yoluxucu xəstəliklərə qarşı isə ildə bir dəfə aparılır. Qeyd etməliyik ki, peyvəndləmə zamanı heyvanların xəstə olması və boğazlıq dövrü mütləq şəkildə nəzərə alınır.

                                Dabaq xəstəliyi və ona qarşı mübarizə

Məlumdur ki, hazırda respublikamızın bir sıra  bölgələrində heyvanlar arasında  dabaq xəstəliyinin yayılması müşahidə olunur.  Təəssüf ki, bu bizim rayondan da yan keçməmişdir. Rayonun baş baytar həkimi E.Zinharov bildirdi ki, bununla əlaqədar olaraq bütün  rayon ərazisində heyvanlar arasında  yayılmış dabaq xəstəliyinə qarşı nəzarət gücləndirilib və diqqətdə saxlanılır, profilaktiki  və müalicə tədbirləri davam etdirilir. Bütün kəndlərdə və şəhərdə əməkdaşlarımız, sahə həkimləri tərəfindən əhali ilə görüşlər keçirilir,  heyvan sahiblərinə xəstəliyin əlamətləri, müalicə üsulları və qarşısının alınması yolları, karantin qaydaları barədə məlumat verilir,  maarifləndirici söhbətlər aparılır. Onu da xatırlatmaq istərdim ki, dabaq xəstəliyi müşahidə edildikdə dərhal təsərrüfata karantin qoyulur və müvafiq qaydalara əməl olunmaqla törədicinin bu ərazidən kənara çıxmasının qarşısı alınır. Mütəxəssisləimiz bu tədbirləri xüsusi geyim dəsti, əlcək və qoruyucu maskalardan istifadə etməklə həyata keçirirlər. Ödənişsiz əsaslarla aparılan peyvəndləmədən sonra dezinfeksiya işləri aparılır. Eyni zamanda, heyvanları dabaq xəstəliyindən qorumaq üçün təsərrüfatlarda mütəmadi baytarlıq-sanitariya tələblərinin aparılması, heyvanların dövri peyvəndlənmədən yayındırılmaması, yeni heyvan aldıqda dabağa və digər xəstəliklərə qarşı peyvənd edilməsi ilə bağlı məlumat almaq vacibdir.

  Quşçuluq təsərrüfatları da baytarlıq nəzarətinin əsas istiqamətlərindən biridir. Ev quşlarında infeksion xəstəliklərin qarşısının alınması, dezinfeksiya tədbirləri və peyvəndləmə işləri planlı şəkildə aparılır. Fermerlər və təsərrüfat sahibləri üçün gigiyena qaydaları, qidalanma və saxlanılma şərtləri ilə bağlı maarifləndirici təlimlər həyata keçirilir. Qeyd etmək istərdim ki, rayon rəhbərliyinin tapşırığına və ciddi  nəzarətinə əsasən  görülən tədbirlərlə bağlı  gündəlik  məlumat verilərək mövcud vəziyyət təhlil edilir.

  Qeyd etmək lazımdır ki, baytarlıq tədbirlərinin səmərəliliyi  həm də əhalinin fəal mövqeyindən də asılıdır. Heyvan sahiblərinin vaksinasiya prosesinə laqeyd yanaşmaması, xəstəlik halları barədə vaxtında məlumat verməsi  bu istiqamətdə görülən işlərin əsas şərtlərindəndir.

Hazırladı: Lalə Ziyadqızı